Rhaglen COVID-19 Nosocomial Genedlaethol
Dysgu o heintiau COVID-19 a geir mewn ysbyty yng Nghymru
Mae pandemig COVID-19 wedi cael effaith sylweddol ar iechyd poblogaeth a systemau gofal iechyd byd eang. Roedd GIG Cymru yn addasu ac yn newid ei ffocws sefydliadol i leihau niwed cyn belled â phosibl. Roedd staff y GIG yn gweithio’n ddi-baid i gynnal gwasanaethau gofal iechyd i’r rhai mwyaf mewn angen. Fodd bynnag, roedd COVID-19 yn haint newydd ac anrhagweladwy a oedd yn ei gwneud yn anodd iawn ei reoli.
Oherwydd maint a difrifoldeb y pandemig, roedd cleifion yr oedd angen gofal arnynt mewn ysbytai a lleoliadau cleifion mewnol eraill yn wynebu risg gynyddol anochel o ddal COVID-19. Roedd rheoli lledaeniad COVID-19 mewn lleoliadau gofal iechyd yn heriol, yn enwedig pan oedd nifer yr achosion mor uchel yn y gymuned, ac mewn ysbytai, roedd lefelau uwch o gleifion difrifol wael, arhosiadau hirach a mwy o bobl mewn gwelyau ysbyty.
Mae natur y pandemig wedi golygu bod niferoedd uchel arferol o ddigwyddiadau diogelwch cleifion o COVID-19 nosocomiaidd (a geir mewn ysbyty) wedi’u cofnodi, gan effeithio ar tua 18,000 o ddefnyddwyr gwasanaethau/teuluoedd ledled Cymru.
Beth yw’r Rhaglen COVID-19 Nosocomiaidd Genedlaethol?
Yn Ebrill 2022, sefydlwyd y Rhaglen COVID-19 Nosocomiaidd Genedlaethol i gynorthwyo sefydliadau GIG Cymru yn eu dyletswydd i gynnal ymchwiliadau i ddigwyddiadau diogelwch cleifion o COVID-19 nosocomiaidd. Weithiau mae heintiau a geir mewn gofal iechyd yn cael eu hystyried yn ddigwyddiad diogelwch cleifion, yn dibynnu ar sut a phryd y cafwyd yr haint ei ddal.
Mae’r Rhaglen Genedlaethol COVID-19 Nosocomiaidd wedi creu fframwaith i sicrhau bod sefydliadau GIG Cymru yn mabwysiadu ymagwedd mor gyson â phosibl at y broses ymchwilio, gan sicrhau bod ymchwiliadau’n cael eu cynnal unwaith ac yn cael eu gwneud yn dda. Hyd yn hyn, mae’r rhaglen wedi cefnogi sefydliadau GIG Cymru i ymchwilio i dros 5,000 o achosion, gan ddarparu rhai atebion i anwyliaid, yn ogystal â dal dysgu a phrofiad.
Dysgu a Gwella ar draws GIG Cymru
Gan gydnabod effaith COVID-19 ar ddefnyddwyr gwasanaethau, teuluoedd, gofalwyr a staff GIG Cymru, mae’r rhaglen wedi mabwysiadu dull dysgu sy’n ceisio peidio â rhoi’r bai, ond sy’n gwneud y mwyaf o’r cyfle i ddysgu a gwella.
Mae GIG Cymru wedi cyhoeddi ei Adroddiad Dysgu Interim ar y Rhaglen COVID-19 Nosocomiaidd Genedlaethol, sy’n rhoi trosolwg o’r rhaglen ac yn nodi rhai o’r themâu dysgu cynnar sy’n dod i’r amlwg drwy’r rhaglen. Mae rhai o’r themâu dysgu cynnar wedi’u categoreiddio fel a ganlyn:
- Profiadau pobl
- Cymorth Profedigaeth a gwasanaethau gofal ar ôl marwolaeth
- Cefnogi’r defnyddiwr gwasanaethau yn ystod y broses ymchwilio
- Cyfyngiadau ar ymweld
- Digwyddiadau diogelwch cleifion a phryderon
- Digwyddiau sy'n ymwneud â diogelwch cleifion y tu allan i ysbytiau GIG cymru
- Nodi, adrodd ac ymchwilio i Heintiau a Geir mewn Gofal Iechyd fel digwyddiad diogelwch cleifion
- Cymhwyso penderfyniadau Peidiwch â Cheisio Dadebru Cardiopwlmonari (DNACPR).
- Canllawiau cenedlaethol ar atal a rheoli heintiau
- Cyflwyno’r canllawiau
- Rheoli achosion
Ceir rhagor o wybodaeth am bob un o’r themâu dysgu yn Adroddiad Dysgu Interim y Rhaglen COVID-19 Nosocomiaidd Genedlaethol.
Darllenwch Grynodeb Hawdd ei Ddarllen o Adroddiad Dysgu Interim y Rhaglen COVID-19 Nosocomiaidd Genedlaethol.